DOMINGU QUINCE

MONICIÓN PA EMPRINCIPIAR: El meotcho de lo que pedricó Xesús ye el Reinu de Dios. Valuse de paráboles pa dase a entender. Yeran comparanzes o cuentos curtios. Valíani pa facer ver a los que lu oyían qué y cómo fai Dios pa que la historia humana vaya aonde Él tien pensao que vaya. Son paráboles del Reinu... Matéu puenxo siete nel capítulu 13 del so Evanxeliu. Un retu antes había dicho (Mt 4,17-11,1) que Xesús trexo el Reinu con lo que dixo y lo que fexo; pero isi Reinu tenía a bastantes en contra (Mt 11,2-12,50)... Les paráboles son un esfuirzu postriru pa ver si esa xente que ta en contra acueye por fin el mistiriu del Reinu de los Cielos... Lo que se viu foi que tenían un corazón duru y nun taban dispuestos a cambiar (Mt 13,10-17)... Xesús nun dexó por eso de semar nin de esperar... Y sigue semando y esperando a ver si entramos nel Reinu.

DOMINGU CATORCE

MONICIÓN PA EMPRINCIPIAR: Nel Evanxeliu atopamos siempre coses que nun mos caben na cabeza. Hoi tien que estrañamos ver a Xesús dandoi gracies a Dios porque les coses del Reinu nun les entienden los sabios y entendíos y sólo les entiende la xente sencietcha... A Dios nun lu asusta que nu entienda la bona noticia la xente importante. Si quieren entendetcha tienen que aprender de los probes y pekenos. ¿Por qué serán les coses asina? Foilo nel tiimpu de Xesús, y yelo agora. Los entendíos de aquel entós habían inventao un montón de normes y obligaciones que decían a la xente que les había que cumplir porque les había dao Dios. Xesús tchevábayos la contraria... ¿Qué pensará Xesús desta socieá onde vivimos? ¿Tarán obligaos, sobre tó los probes, a abuantar les cruces que yos mangan enriba los más ricos y los grandes bancos?... ¿Nun será posible utru mundu?

DOMINGO TRECE

MONICIÓN PA EMPRINCIPIAR: Lo que quería Xesús nun yera tener un grupu que aprendiera de memoria unes dotrines; lo que Él quería yera unos discípulos que fixeran lo que Él facía. Con Él nun pasaba lo que pasaba con los maestros xudíos, que nun se portaban de acuirdu a lo que enseñaban. Xesús facía lo que decía... El mundu nun va cambiase con dichos, por buapos que sean; son los fechos los que lu farán cambiar... Cristienu ye el que escueye facer y decir lo que fexo y dixo Xesús. Ye ísi el camín de los cristianos. Ya desde el principiu, Xesús invita a algunos a que lu sigan (Xn 1,39). Y antes de que tchamaran cristianos a los que seguían a Xesús, decían de etchos que yeran los que andaban pel camín de Xesús... Semos cristianos porque tchevamos el camín que Él tchevó. Y vase tras dÉl prefiriéndolu más que a toes les otres coses.

DOMINGU DIEZ

MONICIÓN PA EMPRINCIPIAR: El Dios misericordiusu déxasemos ver como menos lu esperamos. Goza contando con lo que a la xente mos paez que nun val pa ná... Pa que sean discípulos sos, tchama a pecaores como Matéu. Pa ser padres de un puiblu grande escueye a una parexa de vieyos, Abrahán y Sara. Y cuenta con nosotros, que valimos bien poco, pa facer que'l so Reinu venga a isti mundu... Pa Xesús, ser amigu de pecaores y publicanos yera una manera de decimos cómo ye Dios de verdá. Revélamos asina al Dios misericordiusu, que lu mandó a tchamar a los pecaores... Y ‘tchamar’ ye convidatchos a que entren nel so Reinu que tien una señal y un anticipu na comuniá que se sienta a la mesa con Xesús.

CORPUS

MONICIÓN PA EMPRINCIPIAR: La fiesta del cuirpu y la sangre de Cristu ye la celebración de que el Fiyu de Dios se entregó de a fichu por tós. Nel evanxeliu de hoi Xesús preséntase como pan vivu, y vien a decimos que por Él y en Él poemos tchevar la vía que mos baxa del ciilu (amando, auníos, en paz, dichosos). Pero nun ye menos verdá que comulgar con Xesús ye arriesgamos a ser como Él, faciéndomos pan y vinu que ayúe a los demás a vivir.

LA TRINIDÁ

MONICIÓN PA EMPRINCIPIAR: Estos domingos tamos celebrando fiestes grandes al acordamos de los misterios más buapos de la nuestra fe: la resurreción, la ascensión, el Espíritu Sentu... Hoi acordámosmos de cómo ye Dios, de que son tres Persones tan aunaes que son un Dios sulu. Un Dios que ye Padre, Fiyu y Espíritu Sentu. Un Dios que ye Creaor, que ye Salvaor, que ye Vivificaor... Al conocer al Fiyu conocemos cómo ye Dios; conocemos sobre tó que ye Amor... Na Misa acordámosmos de que mos mandó al so Fiyu pa que mos tchibráramos del infiirnu del egoísmu, de la violencia y de la mentira... Nun poemos catar sitiu más amañusu pa conocer a Dios que nel Pan y el Vinu que son la comía y bebía que Él mos prepara. Son el resumen de cómo ye Dios... El que piense nÉl como nun señorón, nun lu conoz... Dios ye tan buinu que sólo piensa en dásemos. Por eso tien la felicidá, pos 'trai más contintu el dar que'l recibir' (Fechos 20,31). Saber eso y acordamos de etcho a ca poco, entchénamos de confianza y de paz.

PENTECOSTÉS

MONICIÓN PA EMPRINCIPIAR: Xesús prometú mandayos el so Espíritu a los sos discípulos... Nos Fechos de los Apóstoles fálase de varios Pentecostés nos que se fexo sentir el Espíritu Sentu. Del primiru salú la Ilesia (Fe 2,1-13). Del segundu, en tiimpu de persecución, renazú la Ilesia (Fe 4,31). Nutru, bautizose Corneliu y abruse la Ilesia al mundu (Fe 10,44-45)… En Éfesu Pablu bautizó unos discípulos de Xuan, y el Espíritu Sentu entchenó a xente que nun había oyío ná de él (Fe 19,4-6)... El Espíritu de Xesús nun ta quiitu, y fai nacer y renacer la Ilesia y les comuniaes… Nel Antiguu Testamintu cuéntase que Xosué puénxose celusu porque había unos que profetizaban sin que fueran del so grupu, y Moisés contestói: '¡Oxalá recibiera tól puiblu el Espíritu del Señor, y profetizara!' (Núm 11,29)... Ambuano son tamién munchos los Pentecostés: tiempos de cambios nos pueblos, nes persones y na Ilesia, decisiones, compromisos… ¿Nun tuviemos un Pentecostés nuistru?

DÍA LA ASCENSIÓN

MONICIÓN PA EMPRINCIPIAR: Los primeros cristianos taban convencíos de que Xesús había resucitao y de que taba vivu ente etchos. Isi convencimiintu dabai sentíu a la so vida. Tamién nosotros tamos convencíos de que vive ente nosotros, por más que a veces mos cueste descubritchu... Hailos que lu catan en 'apariciones' y en coses grandes o rares. Naide niega que Dios puea valise deses coses, pero el que escoyú como meyor el camín del piselbi de Belén, el ser probe y el morrer crucifikéu paez que nun tien eses preferiencies... Paiciera que pa atopar a Dios ente nosotros ye menester la fe. Él ta presente, sobre tó, nes persones y comuniaes que viven a como Él vivú: obedeciendo a Dios y desviviéndose po los demás. Neses persones y comuniaes pasa algo que nun pue esplicase fácil. Seguro que ye debío a la presencia de Xesús... Nel pan y el vinu de la Misa vien Xesús a co nosotros pa facemos el milegru de que mos querramos y aunemos.

DOMINGU SEIS DE PASCUA

MONICIÓN PA EMPRINCIPIAR: Nisti domingu preparámosmos ya pa la fiesta de Pentecostés. Xuan ponmos tres discursos de despedía de Xesús antes de la so pasión y muerte. Nel de hoi fálamos de que va venir el Espíritu Sentu, que ye'l que va facer que la tchabor de Xesús siga cumpliéndose. Xesús tchámalu 'el utru Defensor' (Xn 14,16). Va tar a co'l creyente, defendiéndolu, ayuándolu. Lo mesmo que fai Xesús, que ta xunto a los sos amigos; por eso Xuan lu tchama el Defensor (1 Xn 2,1). El Espíritu vien 'pa que tea siempre con vosotros' (Xn 14,16), y conocémoslu, pos 'vive con vosotros y ta en vosotros' (Xn 14,17)... Lo que importa ye que dexemos que'l Espíritu de Xesús mos fale, mos esplique tó lo que Xesús fexo y dixo, y mos emburrie pel camín que Él sigú... Que'l nuistru espíritu se entchene del Espíritu de Xesús.

DOMINGU QUINTU DE PASCUA

MONICIÓN PA EMPRINCIPIAR: El domingu segundu de Pascua víamos cómo vivía la primer comuniá, y lo bien que se tchevaban. Hoi vemos cómo empiezan a oyese quexes. Apaizú el favoritismu. A la hora de dar el suministru a los probes, había preferiencies... Nun tien que estrañamos. Tchevamos apegaes a la petcheya una camá de miseries y ruindaes... Los Apóstoles fáense kergu del poblema y reúnense con la xente. Discuten y tchegan a un acuirdu xuntos... Pa que los poblemes se resuelvan, ye menester enfrentase a etchos. Nun ye cristiana una comuniá que solo se axunta pa rezar un retu y oyer lo que dixo y fexo Xesús, pero vive despreocupá de los que tienen fame o nun tienen cómo vivir... Ibual que Xesús, la comuniá cristiana tien que dar vida a los otros; ye eso lo que i da sentíu a la vida que tenemos.

Seguir leyendo...

DOMINGU CUERTU DE PASCUA

MONICIÓN PA EMPRINCIPIAR: Una forma de la que se val Xuan pa revelamos quién ye Xesús, ye diciendo: 'Yo soi'. Unes veces siguen otres palabres: 'Yo soi el Pastor buinu', 'Yo soi la recimal verdaera', 'Yo soi el Pan de vía'... Otres veces nun diz más que 'Yo soi' (Xn 8,24.28.58)... Presentase desa manera tien muncha fuerza, pos ye como lo facía Dios nel Antiguu Testamintu (Ésodu 3,14; Is 43,11)... Xuan, al valise deses palabres quier decimos que Xesús fala y failo tó nel nome de Dios. Los que lu oyen estráñanse de que un home fale a como fala Dios... Al decir 'Yo soi' dayos respuesta a los que esperaban que Dios cumpliera lo que había prometío y preguntaban quién sería el Mesíes... Al que pregunte quién pue enseñamos el camín, quién mos va decir la verdá, quién mos va traer la paz y la vía, Xesús contestai siempre: 'Yo soi'.

TERCER DOMINGU DE PASCUA.

MONICIÓN PA EMPRINCIPIAR: El evanxeliu de hoi fala de dos homes. Dían per un camín, atristayaos y sin ánimos pa ná. Taban como perdíos y tchevaban direción contraria de onde habían tao, escapándose sin saber pa ónde nin pa qué. Habían pensao que diendo tras Xesús atoparían lo que tanto querían: la tchiberación del so puiblu y un mundu xustu y hermanéu. Pero día tres dís que lu habían matao, y habíayos cayío el alma a los pies... Son figura de antano y de ambuano. Figúranmos a nosotros... Porque a nosotros pásamos algo asomeyao. Dos mil años más terdi, nun se ve cota a les cruces. Nisti mundu ca vez hai más probes, más fame, más guerres, más drogues, más xente que nun pinta pa ná, más pueblos y naciones a la vera'l camín, en sin ver que tchegue un futuru meyor. Y nun sabemos pa onde agarrar. Éntranmos ganes de dexatcho tó, y hasta de pasamos al enemigu, al montón de xente que nun quier que les coses cambien... ¿Reconoceremos a Xesús xunto a nosotros?

DOMINGU SEGUNDU DE PASCUA

MONICIÓN PA EMPRINCIPIAR: ¿Cómo tien que ser una comuniá cristiana pa que puea decise detcha que tcheva una vía nueva? El Nuivu Testamintu traimos varies formes. Asina Matéu dizmos cómo tien que ser, nel discursu de la comuniá (Mt 18,1-35), y nel sermón del monte (Mt 5-8)... Marcos dízmoslo cuando mos pon delantre lo que tien que atchugar el Bon Anunciu na vía del puiblu (Mc 1,16-45)... Lukes fálamos deso cuando mos diz cómo vivían los primeros cristianos. Pa él nótase la vía cristiana de la comuniá, y mantiense, por la enseñanza de los apóstoles, la vía fraterna, el partir el pan y les oraciones... ¿En qué se notará que la comuniá nuestra ye cristiana?

TRIDUU PASCUAL

RAMOS

MONICIÓN PA EMPRINCIPIAR: Xesús entra en Xerusalén. Unos pocos anímanse y salen a escontra dÉl y reconócenlu como Mesíes. Ye poca cosa, pero nun dexa de ser un triunfu. Nu hai comité de recibimiintu... Montéu nun burru, nun paez rei... Isi día tovía había algún animéu a gritar que Él yera el Mesíes. Pero nun van durayos muncho los ánimos... Pregúntome si a Xesús nu i prestó más aquetcha procesión de xente probe y con ganes de ver cambiar el mundu inxustu, que les procesiones solenes, de xente convencía de saber lo que ye y trai Xesús, pero que nun dexan les poltrones pa trabayar pol amor y la xusticia.

DOMINGU QUINTU. Cuaresma

MONICIÓN PA EMPRINCIPIAR: El domingu paséu, Xesús decía: 'Yo soi la tchuz del mundu'. Y quitói la ceguera a ún, curó a un ciigu de nacimiintu, dandoi tamién la fe nÉl... Hoi dizmos: 'Yo soi la resurreción y la vía'. Y Lázaru, que fedía porque tchevaba ya cuatro dís muirtu, resucitó... La resurreción de los muertos ye un puntu principal de la fe. Ye algo mui serio na vía de caún. Que la tierra sea reonda o que se paeza a una pera, nu importa muncho. Pero la fe na resurreción tien que ver con el camín que tien que tchevar caún, con el sitiu pa onde tien que amirar, con el cómo tien que comportase.

CUERTU DOMINGU DE CUARESMA

MONICIÓN PA EMPRINCIPIAR: La curación del ciigu de nacimiintu ye otra de les señales (la seis) que fexo Xesús, y que mos pon Xuan na parte primera del so Evanxeliu. Val pa que atolenemos que Él ye 'la tchuz del mundu' (Xn 8,12). Con isi milegru vese que unos aprosímanse a la tchuz y déxanse atchumar, mientres que otros prefieren andar a escures... Nel ciigu y nos fariseos y maestros de la Lei tamos representaos tós. Poemos andar a escures, dandoi les espaldes al que ye la tchuz del mundu; pero tamién poemos dir descubriendo a 'isi home que se tchama Xesús' (Xn 9,11), que 'ye un profeta' (9,17), que 'vien de parte de Dios' (9,33), que ye 'el Mesíes' (9,22), 'el Fiyu del home', 'el Señor' (9,35-37)... Tamos aquí porque nun vemos bien el camín. El emu'l mundu, mentirusu y trampusu, con propaganda y males artes, escurez el camín y nun mos dexa ver... Queremos que Xesús mos atchume. A eso venimos.

DOMINGU TERCERU CUARESMA

MONICIÓN PA EMPRINCIPIAR: Na Biblia úsanse munches palabres que tienen un sentíu simbólicu. Los símbolos valen pa conocer meyor algo, sabiendo que 'conocer', na Biblia, nun ye algo que se fai con la cabeza; conozse con el corazón y les entrañes. Lo que Xuan quier decimos con símbolos como abua, pan, camín, tchuz, tiniebles, puerte, palabra..., nun se conoz sólo con la cabeza, conozse con el alma, con les emociones... Hoi fálamos de abua. El abua cai de riba, y fai que la tierra dea frutos. Por eso ye símbolu del Espíritu. Ye el reguelu de Dios que Xesús mos trai. Quita la sé, y faimos dar los frutos que a tós mos presta ver: amor, xusticia, unión, paz. Ye un abua que mos fai vivir como fiyos de Dios. Por eso, «l'últimu día, el más sonéu de les fiestes, decía Xesús a voces: El que tenga sé que venga a mí; el que crea en mí tendrá de beber. Dizlo la Escritura: 'De él van salir ríos de abua viva'. Referíase al Espíritu que dían a recibir los que creyeran en Él» (Xn 7, 37-39).

DOMINGU SEGUNDU CUARESMA

MONICIÓN PA EMPRINCIPIAR: Nel domingu segundu de cuaresma vese siempre la Tresfiguración de Xesús. Ye pa que mos acordemos de la resurreción. La cara que 'retchumaba como el sol y los vestíos que retchucían como la tchuz' (Mt 17,2) faen que mos acordemos de la tchuz de Pascua. Con la muerte de Xesús nun se apoeran les tiniebles de tó; apúoles Él de antemano. Pero nun se pue olviar que hai que pasar per la muerte. 'Pascua' vien de 'pasar'. Pa mientres pasamos per la muerte tenemos menester de la fe. La fe fai que téamos seguros de resucitar; nun vamos resucitar porque lo merezamos: ye un reguelu de Cristu Xesús.

DOMINGU PRIMIRU CUARESMA

MONICIÓN PA EMPRINCIPIAR: Los homes y les muyeres tenemos munches veces que decidimos y escoyer. De lo que decidamos pue depender el futuru nuistru. Como nun vemos claro per qué camín agarrar, nun ye ná raro que escoyamos el que mos paez más buepu y seguru, o el que menos va costamos, en sin ver que pue retorcese y salimos mal. Eses son les tentaciones que mos tchevan a escoyer lo que ye malo pa nosotros o pa los demás... Pa cumplir con la so misión, Xesús tuvo tamién que escoyer: o dir pel camín que'l Padre i decía, o dir per utru camín más facilón y más buepu, que i costara menos a Él y que yos gustara a los sos seguiores... De eso mos fala la liturxia disti domingu primiru de Cuaresma.

DOMINGU SIETE DEL TIIMPU ORDINERIU

MONICIÓN DE ENTRÁ:Seguimos estos domingos con el que se conoz como Sermón del Monte. Matéu a lo señalao nes leyes que se tchaman de Moisés contrapón un comportamiintu nuivu: el de los que catan el Reinu, una “xusticia que sobrepasa al comportamiintu que tienen los escribes y fariseos” (Mt 5,20)... ¿Cómo portase con los que son malos con nosotros? ¿Conformase con que se yos aplique la lei?... Nun se trata de añadir artículos nuevos a la lei: trátase de que ye preciso poner alma y sentíu a la lei... El alma y el sentíu de la lei ye el amor.

DOMINGU SEIS

MONICIÓN DE ENTRÁ: La primer tchetura de hoy emprincipia diciendo: “si quies, pues”... Paezme que ye'l meotcho de lo que Cristu mos diz desde les altures del monte aquel que escoyú pa falamos. Acuérdamos que semos tchibres. La lei nueva nun ye un “tienes que”, nin ye un “debes de”. Ye un: “si quies, pués ser dichusu”... El asuntu ye “escoyer”... Como si mos dixeran: 'si nun quies ser ún cualquiera', 'si nun quies malgastar la vía nin perder el tiimpu', 'si nun quies facer el tuntu', entiende lo que quiero decite, cumple con etcho, apriéndeyoslo a los otros... Pero antes de aprendeyos ná a los otros, ye preciso ¡haber entendíolo!, y antes tovía ye menester ¡haber cumplíolo!... Si piensas que los demás nun te entienden lo que yos dices, ¡enséñayoslo con les obres! ¡Que obres son amores, y non bones razones!